立法會後日審議財政預算案撥款，社民連主席梁國雄（長毛）講明提出二百至三百項修訂「拉布」，希望迫使政府落實全民退休保障。如果長毛玩到五月尾都唔肯收手，咁全部政府部門都會因為無錢而全面癱瘓，泛民聞到燶味終於瞓醒，今日會召開「特別飯盒會」商討對策，好大機會收回所有修訂，避免讓人錯覺佢哋同長毛一齊拉布。
長毛尋日強調，自己無意停止拉布，因為呢個係最好方法迫使政府落實全民退保，仲話其他泛民議員如果唔拉布，應該喺政綱剔除「爭取全民退保」。由於長毛堅持拉布，到最尾分分鐘玩出火，所以今鋪泛民唔再傻吓傻吓等運到，公民黨同民主黨今朝會開黨團傾立場，下晝同其他泛民再開會諗吓點拆招。
其實泛民提出嘅修訂都係得幾十個，以消耗時間計都唔屬於拉布，但佢哋最怕長毛惹起嘅火會燒埋佢哋嗰疊，到時市民就唔止鬧長毛一人。
所以泛民好大機會收回所有修訂，等長毛一人孤軍作戰拉布，而人民力量話就話提出修訂，但暫時未有具體內容。至於會唔會拉布，人力陳偉業就話睇長毛頭。
睇怕班議員都驚有民意反彈，唔敢亂咁拉布。