政情：與何世柱論壇大戰 吳秋北愈來愈揪得
工聯會理事長吳秋北一向文質彬彬，唔屬於牙尖嘴利一類，但自從佢上年當選港區全國人大代表，成為首位「七十後」嘅人大新丁後，吳秋北似乎愈戰愈勇，一洗「唔揪得」嘅頹氣。好似佢尋日以勞方身份，出席港台《城市論壇》討論標準工時立法時，就罕有同職工盟秘書長李卓人槍口一致對外，聯手夾攻代表資方嘅中華總商會永遠榮譽會長何世柱。吳秋北字字珠璣之餘，反應間中仲快過李卓人添！
斥標準工時立法太耐
吳秋北經歷港區人大選舉後愈見敢言，尋日除咗狠批政府需時三年研究標準工時立法係「太耐」之外，又指摘商界嘅強硬態度令政府不得不拖慢進度。何世柱引用政府報告解釋，指一旦落實標準工時，將令僱主成本額外高出五百億元，吳秋北聽罷即時插嘴，反駁「呢五百億應該解讀為僱主長期壓榨工人所得」，批評「個個老闆都側側膊（唔加班補水）」，要求商界將呢五百億元「霸王餐」還番畀工人。
吳秋北同何世柱都兼任勞工顧問委員會同標準工時委員會委員，二人將勞資角力戰場移師到論壇依然火花四濺，相信雙方就標準工時立法嘅爭議，拗三年都唔夠。