政情：珠姐率二百師生遊首爾
朝鮮半島戰雲密布，北韓揚言導彈已準備就緒，不過過咗幾日都無發射，部分香港人都畀佢嚇親，韓國都唔知去好定唔去好。前東區區議會主席丁毓珠二話不說率領逾二百人遊首爾，佢話當地人一啲都唔緊張，街照行、飯照食、嘢照買，不知幾咁開心。
臨去機場狂掃貨
家族經營幼稚園嘅珠姐，上周三與一眾學生、家長及老師同遊首爾，來個五日四夜親子樂，成團人合共逾二百人。抵達首爾後，市面氣氛好熱鬧，遊客處處，當地人如常返工，絲毫無意撤離韓國。睇見呢幕，團友個心定晒，珠姐策劃晒節目，先到訪著名嘅梨花女子大學，再參觀泡菜製作，又畀學生試穿韓服，最後到訪埋農場，體驗揸牛奶同炮製燒餅，行程緊密，乜嘢打仗威脅都忘記晒。眾人又拉隊品嘗馳名人參雞湯，有份安排行程嘅康泰旅行社太子爺黃進達更親自探班，認真唔話得。
行程結束，臨去機場前，珠姐把握僅餘四十五分鐘，快速去百貨公司狂掃護膚品及柿餅，幸好上機一刻，仍然天下太平，認真Lucky嘞。