中環出更：黃志祥愛駒百分百「報恩」
信置主席黃志祥家族近年馬運亨通，愛駒「連利多」尋日又奪冠，連埋早前兩次出賽均跑出第一名，勝出率達百分百，難怪衝線一刻，黃志祥「Ｏ」晒嘴，唔敢相信。「連利多」跑得咁搏命，原來多得主人錫晒佢。
屢戰屢勝嘅「連利多」，上月本來已準備出戰打吡賽，但馬匹有腳傷在身，黃志祥諗咗一陣，決定放棄，讓愛駒好好養傷，未知「連利多」係咪感恩圖報，尋日出戰快活谷賽事第十場，搏晒命跑。頭馬獎金高達一百一十四萬元，認真和味。匹馬屬千金黃敏華所有，黃志祥都戥囡囡開心。佢發表得獎感受話:「證明你對隻馬好，佢都會對你好。」呢招對待員工應該好使得。
朱繼陶：港樓無投資價值
同場仲有太子珠寶鐘錶執董朱繼陶。政府雙辣招下，樓市成交「謝晒」，名人紛紛聲言「今年唔買樓」，朱生都認為，香港住宅已喪失投資價值，買樓制唔過。佢分析話，喺加重炒樓徵稅後，炒樓成本大增，吸引力大降，佢身邊唔少朋友近日已轉投美國樓市懷抱，升值水位大好多。不過朱生公子舊年都買咗樓，幸好係首次置業，唔使畀重稅喎。
卓妮