中環出更：盧偉國夫婦詼諧唱腔 逗笑籌款
中大逸夫書院每年都會舉行「吐露絃歌粵曲籌款晚會」，廣邀名伶及粵劇曲藝愛好者擔任表演嘉賓。逸夫書院院長陳志輝今次亦粉墨登場，同閨秀名唱家張琴思合唱一曲《聲聲慢》，仲請到音樂好手、工程界立法會議員盧偉國（WK）同盧太黃少珍合唱一首《呃神騙鬼》。
《呃神騙鬼》故事講述由盧太扮演嘅婦人多日盼夫未歸，於是就請算命先生幫丈夫占卜歸期，點知就被假扮盲眼嘅地水先生WK亂扯一通，話佢老公被小人與邪花所困，如果想老公平安歸來，就要交出所有首飾珠寶作法祈福。婦人信以為真，將身上所有財物交予對方，騙子得手後逃之夭夭，而婦人就無辜破財。WK出場時戴上墨鏡，又不斷摸索扮睇唔到路，將盲眼地水先生扮得維妙維肖。夫婦兩人以詼諧嘅唱腔一唱一和，逗得台下笑聲不絕。
中大副校長亦初試啼聲
陳志輝係前粵劇發展基金委員會委員，佢透露，籌款活動至今已經舉辦咗七年，不過籌款成績並唔係書院最重要嘅考慮，最緊要嘅就係向外推廣藝術文化，以及提供平台畀粵劇曲藝愛好者交流粵劇心得。
陳志輝當晚仲邀請到中大副校長霍泰輝初試啼聲，同話劇工作者殷巧兒合唱一曲《帝女花之庵遇》。霍泰輝自認粵曲「初哥」，由細至大雖然鍾意睇粵劇，但就未正式拜師學藝學過粵曲。佢話初時陳志輝邀請佢表演時，仲以為觀眾得嗰小貓三四隻，完全估唔到要當住幾百人面前表演。
佢話自己緊張咗幾個月，仲因為練得太耐而幾乎失聲，又話擔心其他人聽得出佢唱得唔好。不過觀乎當日所見，副校長初時表現雖然有啲緊張，但後來愈唱愈好，博得台下觀眾唔少掌聲。
卓妮