三女之母憂樓價 自責幫唔到畀首期
【本報訊】「我做到六十歲都唔敢退休！」在新蒲崗經營士多的方女士，約廿年前患上情緒病，近年眼見樓價飆升，剛成家的大女兒上樓卻遙遙無期，日夜擔心至茶飯不思：「我真係無用，連首期都幫唔到佢哋畀！」她坦言港人「一生做樓奴」，痛心下一代看不見將來：「我三個女兒連屋都買唔起，點樣生兒育女？」
年屆六旬怕失工作
為家計奔波操勞的方女士，九五年起經常手心出汗、睡不能安寢，求醫後確診患情緒病：「等政府醫生覆診要排大半年，我有時情緒低落到等唔到，只好畀成千蚊睇私家醫生！」她現在病情較為穩定，不過年已六旬卻未敢言休，寧願繼續服藥控制病情，堅持繼續工作：「我成日好驚做唔到嘢，做唔到嘢點生存？我要養活自己，唔想畀下一代負擔！」
近年物價飛漲，維持生活愈見艱難，方女士說過去一年通脹已至失控地步，「我先生呢排日日買芽菜、青瓜，我先發現依家菜心漲價到廿蚊斤！」她說，自己與丈夫月入僅約萬元，加上通脹令士多來貨價暴升，店舖利潤愈見微薄，捱得一天是一天，簡單的心願是「六十五歲可以安心退休，享受下政府福利。」