嘩嘩嘩，疫症北上，候鳥南飛，呢次真係唔講得笑！
功夫茶講緊嘅咪就係變種禽流感咯。嗱，疫症爆發一個幾月來，感染個案本來一直限於華東地區，近日終於蔓延到華北，北京一位七歲女童中招，證實病毒無處不在，睇怕其他省市都幾難幸免，感染個案陸續有來，大爆發可能只係遲早嘅咋。
大家咪以為唔關香港事吖。港大微生物學系講座教授袁國勇警告，就算本港及珠三角一帶目前仍安全，但當冬季候鳥南飛，本港雀鳥及家禽分分鐘受到感染而爆發疫症o架。港大感染及傳染病中心總監何栢良更指出，內地多個省市相繼出現感染個案，顯示病毒已經擴散，遲早傳到香港，促請當局考慮全面落實人雞分隔措施，禁止街市售賣活雞。
即係咁，係咪禁止街市售賣活雞，暫時未有定論，但喺疫症步步進逼嘅情況下，提升警戒級別，加強防疫措施，就刻不容緩喇。尤其係醫院，作為抗疫重鎮，更加要嚴陣以待，隨時應變。講開又講，內地爆發疫症已經一個幾月，本港公立醫院究竟準備成點呢？
唔係功夫茶杞人憂天，以目前嘅情況嚟睇，如果疫潮來襲，真係未可樂觀o架。係人都知，公立醫院問題多多，千瘡百孔，平時都倒瀉籮蟹，七國咁亂，莫講話要對付大規模疫潮。呢，聽吓醫療界人士點講吖。前線醫生聯盟主席蕭旭亮現身說法，踢爆本港醫療兩大問題，第一無視長期人手規劃，第二欠缺全盤視野，簡單啲講，即係人手不足。試諗吓，面對來勢洶洶嘅疫魔，公立醫院居然唱空城計，咁又點樣抗疫呢？
話時話，公立醫院人手不足唔係一朝一夕嘅事，早就搞到怨聲載道，士氣低落，可惜當局一直束手無策，一味頭痛醫頭，腳痛醫腳，不斷拖延問題。講起上嚟，呢啲都係前朝政府留低嘅爛攤子，醫院人手本來已經夠緊張嘅喇，貪曾仲話要發展乜嘢醫療產業，導致問題更加惡化，以前係十個煲七個蓋，依家隨時變成十個煲五個蓋，想唔出事都幾難。貪曾好大喜功，但又眼高手低，簡直累人累物。
無論點都好，工欲善其事，必先利其器。面對內地禽流感及中東新沙士嘅雙重威脅，香港危機重重，隨時淪陷，當務之急就係先執番正公立醫院，加強防疫陣地。正如蕭旭亮話齋，就算前線醫護人員克盡己任，做好本分，但面對制度引起嘅問題都感到十分無奈，希望食衞局局長高永文處理奶粉及雙非問題之餘，亦要着手解決長期而又核心嘅醫療問題。冇錯嘞，今時今日各種疫症揮之不去，醫療問題唔解決，香港遲早冇運行嘅咋！