傳統上農曆新年後係打工仔轉工嘅高峰期，估唔到呢個現象喺政界都發生，事關多名立法會議員同區議員不約而同喺上月中開始登廣告請人。其中出手最闊綽嘅係最近賣舖勁賺八千幾萬元嘅立法會議員陳鑑林（橄欖），佢聘請議員助理嘅月薪介乎一萬二千至一萬五千元，仲寫到明有雙糧。
有知情人士話，橄欖本身已有三個立法會助理，冇聽聞過有人離開，莫非橄欖有意進一步深化地區工作？
至於兩名超級議員李慧琼（Starry）同涂謹申，出手聘請助理嘅待遇都差唔多，起薪點都係九千元，其中Starry最高可以畀到一萬一千元，相比之下，沙田區議會副主席彭長緯一出手就畀到立法會助理嘅價錢，佢聘請區議會助理月薪介乎一萬至一萬二千元，較為特別嘅係註明要誠實同有責任心，認真耐人尋味。
對於其他資源較為有限嘅區議員，好似大埔區議員任啟邦就諗出聘請兼職議員助理，時薪介乎三十八至四十二元，每星期只須返工三至四日，每日工作四至六小時。
至於西貢區議員陳繼偉則開設初級區議員助理職位，但佢要求申請人要有一年工作經驗，月薪僅介乎六千至八千元，出手似乎低咗少少喎。