中環出更：梁智鴻笑叫中大接管港大
香港大學同中文大學多年來都係競爭對手，佢哋尋日就攜手舉辦研討會，討論本港大學應該點樣培育新世代人才。不過，港大校務委員會主席梁智鴻（金刀梁）喺研討會上話，佢同中大校董會主席鄭海泉好老友，絕非競爭對手，每次見面會例牌講笑，叫對方take over（接管）港大。
沈祖堯籲學生放眼世界
金刀梁咁有幽默感，鄭主席都會回敬一句：「不如你都take over中大啦！」金刀梁之後就好感慨話，將來唔知會唔會有一日，兩間大學可以合而為一，咁大家就可以做少好多嘢喇。金刀梁竟然夠膽講笑叫港大入贅中大，唔知研討會後有冇港大人向佢詐型呢？
中大校長沈祖堯分享時話，全球步向一體化已經係一個不爭嘅事實，大學除咗要向學生傳授知識外，仲要幫助佢哋塑造做人處世態度，令佢哋敢於同來自世界各地嘅學生競爭。佢又呼籲本港學生放開眼光，遠望全世界，唔好單係將目標局限喺搵工同儲錢買樓之上。
卓妮