中環出更：仁濟新主席新大計中醫院
浸會大學爭取九龍塘李惠利學校地皮興建中醫院，美夢會否成真仍係未知之數，興建全港首間中醫院嘅頭啖湯，隨時被其他機構搶飲。仁濟醫院新任主席梁昌明（Raymond）日前喺就職禮上，揚言董事局將發力籌款進行第二期重建計劃，包括興建可能係全港首間嘅中醫院。擔任今屆籌款委員會主席嘅第一副主席蘇陳偉香笑稱已部署撲水大計，加埋董事局手足幫手，實砌得掂嘅。
城中各大慈善團體近期接力換屆，已經就職嘅東華三院主席何陳婉珍、保良局主席鄭錦鐘拉大隊去捧場。交出仁濟主席火棒嘅鄭承隆話，去年總籌款金額逾七千萬元，總算有交代。接棒嘅Raymond都唔執輸話，今屆籌款額目標係突破億元大關。佢仲提出一個「五五計劃」，極力爭取用五年時間擴大社會服務規模，令政府撥款相應增加，由善團排名第七位，躋身前五位之列。
前仁濟主席董吳玲玲亦有到場，佢戴住一條設計別出心裁嘅珍珠頸鏈，而並非至愛嘅翡翠，原來佢最近搞搞新意思，設計多款珍珠首飾，將喺本月底嘅珠寶展中首次亮相。前仁濟主席王忠秣亦現身支持兒子王賢訊（Vincent），事關Vincent今屆升呢做副主席。王忠秣話，阿仔加入仁濟已經七年，日後要花更多時間投入慈善工作，已批准佢返少啲工㗎喇！
鄭承隆落莊 粵帶團進香
身兼新民黨副主席嘅鄭承隆，落莊後將專心部署從政之路，佢六月初就會帶二百名團友到廣東龍母廟進香。佢笑稱，呢個係中產團，事關團友將會入住六星級酒店，歎咖啡，只差冇法國電影睇咋！
卓妮