醫健：80後少女 擺脫十年夢魘
【本報訊】廣華醫院針灸治便秘的新療法試行約一年，參與治療之一的八十後女患者，自小受便秘問題困擾，她於十年前開始打針及服藥治療，但成效不顯著，社交生活亦受影響。至去年接受針灸，完成療程後病情大為改善，「大便冇咁硬，痔瘡亦痛少咗，去廁所亦唔使用咁大力」，雖然仍要定時覆診，但總算暫時擺脫困擾多年的夢魘。
現為大專生的李小姐小學時已受腹痛問題纏繞，曾因肚痛往急症室求診，證實她的大腸蠕動較慢，中學時期她因大便出血及生痔瘡再次求診，「大便好硬，有時幾日先有得去（廁所）一次。」至十三、四歲開始服用西藥，其後打針將痔瘡縮小，但前年痔瘡復發，如廁時總令她痛不欲生。
去年十一月她於綜合便秘治療診所接受物理及針灸治療，經過約八周的療程，加上在營養師指導下改善飲食習慣，多吃水果、蔬菜及麥皮等，終令她的便秘情況大大改善，「以前兩、三日都未必去到（廁所），依家幾日內一定有，痔瘡痛仲少咗，大便亦冇咁硬。」
「街唔敢去 做咩都冇心機」
李小姐仍需定期覆診，約半年後需再進行物理治療，但她認為治療令她暫時擺脫便秘困擾，「以前好麻煩，成日肚痛，唔敢亂食嘢，街又唔敢去，做咩都冇心機，連社交生活都影響埋，即使拍拖，都好難同男朋友講我有呢個問題，依家情況好好多。」