廠商會立法會代表林大輝年初加入沙田地區政團公民力量（公記）後，大家都以為佢泊到個好碼頭，但原來公記只係佢嘅中途站。大輝話，至今仍然願意同任何政黨合作，喺芸芸政黨之中，又以自由黨同佢理念最相近，而佢本人都好欣賞身為商界嘅田北俊可以瞓身地區工作。睇嚟大輝為咗幫直選鋪路，分分鐘同自由黨合作都未定。
大輝坦言，自己只係公民力量普通會員，並唔算核心成員，亦唔代表佢會拒絕其他政黨邀請，只係目前冇人搵佢。佢個人認為，同自由黨算係最夾，各方面都好相近。嘩，就咁聽佢講，唔通佢同自由黨好事近？
有自由黨消息話，田少做埋今屆後，年紀都唔細，會否競逐連任都唔知，而該黨同大輝經過特首選舉後，大家都有「共同目標」，所以合作機會絕對唔細，但喺選舉前夕先至合作都未遲喎。
其實大輝有此打算，都係基於直選考慮，因為公記消息話，大輝同沙田區議員龐愛蘭現時都係具備直選能力嘅會員，公記入面班兄弟都未決定撐大輝定龐愛蘭出戰下屆直選，如果到時決定撐龐愛蘭，大輝分分鐘乜都冇，所以大輝主動出擊話想入其他政黨，都唔係冇道理嘅。