H7N9禽流感嘅病例每日增加，但原來呢個病毒名早已話畀大家知真係好難搞。叙福樓集團執董黃傑龍（Simon）尋日就喺社交網站分享咗段有趣故事，話當中國發現呢種新病毒時，已知道病毒會比H5N1厲害，但又唔知起咩名好，於是請教世衞總幹事陳馮富珍。點知陳太都諗到頭痕，所以去請教身在香港嘅食物及衞生局局長高永文醫生，高醫生睇過份報告後話：「呢個病毒好×難搞……」此時，高醫生就靈機一觸諗到，既然之前嗰種病毒叫H5N1，咁今次就叫H7N9啦，係「好×難搞」嘅縮寫。嘩，高醫生斯斯文文都會講粗口？Simon回覆我哋就笑笑口話，佢同高醫生係好朋友，呢個故事只係講吓笑喎，純屬虛構。（互聯網）