政情：「限位令」治標唔治本 立會餐廳加露天位
為確保立法會工作人員喺午膳時間內可以喺大樓餐廳搵到位食晏，主席曾鈺成同秘書長陳維安（Kenneth）決定倣效政府嘅「限奶令」，下令每日十二點半至一點半推行俗稱「立人立飯」嘅「限位令」，將約五十個座位劃為只供立法會職員使用，防止街外人到餐廳霸位食飯。不過，有議員認為要好似奶粉咁增加供應先可治本，所以建議餐廳增加座位供應。
有立法會行政管理委員會成員透露，由於餐廳面積唔算好大，即使推行「限位令」後都未必夠位容納所有立法會職員，所以經過討論後，行管會決定今年夏天開放餐廳外嘅露天範圍，容許擺放三至四十個座位，等幫襯餐廳嘅人可以坐喺大樓外食飯。之前唔少立法會保安都大呻食晏時間搵唔到位，搞到反而要出去其他地方買飯盒返立法會開餐，行管會現時雙管齊下，相信有望解決職員溫飽問題喇。