政情：泛民齊插 李漢奸跪低

接納委員會集體提名選特首

李漢奸上月先至搶先公開支持「佔領中環」行動，仲口口聲聲話願意被吊銷資深大律師嘅牌照，成為行動犧牲下嘅第一被告，可惜掌聲欠奉，更被炮轟「偽善」。點知佢尋日再發功，公開表明接受維持現有嘅提名委員會，而且接納委員會集體提名嘅原則，只係要求委員會一人一票揀出候選人，得票最多嘅五個人就可以入閘競逐特首，希望泛民成員可以循機制入閘，佢更自誇方案「起碼唔係向後行」。

不過，泛民多個政黨聽聞呢個「李漢奸方案」後，都即時同呢位所謂嘅「民主之父」劃清界線，議員認為方案讓步太多，擔心雙方一退一進「最終會得個桔」。工黨何秀蘭亦表明，唔接受任何設有篩選嘅選舉方案。就連向來同聲同氣嘅黨友劉慧卿都唔攬佢，強調雙方事前冇傾過讓步方案，並「唔代表民主黨立場」，大是大非面前，連創黨主席都冇面畀！

至於代表廿七個泛民立法會議員嘅真普選聯盟尋晚開會後，召集人鄭宇碩亦表明泛民成員入唔入到閘，唔係聯盟嘅主要考慮，暗批李漢奸唔跟大隊，為咗一己私欲而「跪低」。相反，向來企喺對立面嘅民建聯主席譚耀宗就罕有大讚李漢奸嘅方案「務實」，認真諷刺！

李漢奸唔知係咪嫌辣得個火頭唔夠勁，佢其後接受訪問時，仲不忘建議泛民各黨派可以一齊傾，甚至同中央傾，但提醒過程要謹慎，因為以往「畀人賣過好多次豬仔」，但其實泛民上上下下畀佢賣豬仔至真！李漢奸立場搖風擺柳，如果身處「三年零八個月」日佔時期，一定前途無可限量。