中環出更：榮升「保良一哥」鄭錦鐘全家撐場
「善團」輪流換屆，尋日輪到保良局。鄭錦鐘（Eric）正式登上主席寶座，各方好友嘅賀禮別出心裁。代理英國一個男裝品牌嘅總理陳正欣，為保良訂造會呔，藍底紅點夠晒醒目，限量只有九條，有錢都買唔到；金利來太子爺曾智明就送上一百條領呔賀董事局換屆，物輕情意重。
保良局董事局就職禮喺銅鑼灣總部舉行，冠蓋雲集。Eric全家上下總動員打氣，鄭太關巧妍（Katie）穿上著名時裝設計師楊遠振設計嘅橙紅色連身裙，喜氣洋洋。Katie話，預咗老公嚟緊多應酬，近日四出置裝，購入多條新裙，仲搵埋前教育局局長孫明揚太太鍾小芬做形象顧問添。
太太「奉旨」添置新裝
鄭太「奉旨」Shopping，Eric話預咗月尾卡數大出血，自己反而冇乜買新衫。身為深水埗區議員嘅大仔鄭泳舜（Vincent）都孖埋太太胡可兒捧場。爸爸做咗「保良一哥」，但係Vincent就坦言未打算加入做總理，只想一心一意從政。
卸任主席嘅梁寶珠都表現風騷，過去一年晚晚工作至深宵，長期唔夠瞓，如今落莊，要好好充電。朝鮮半島緊張局勢升溫，北韓領導人更高調宣戰，陳正欣認為北韓只係扭計，唔會真打，反而擔心全球經濟依然疲弱，前景睇唔通。咁投資乜好？都係按兵不動，寧願保守啲喎。
講番就職禮，今屆「升呢」嘅仲有榮升做第五副主席嘅玩具大王蔡志明太太蔡李惠莉，而總理新丁就多咗前仁濟醫院主席李文斌太太李何芷韻。
卓妮