港台為慶祝「大專辯論賽」三十周年，尋日特別同場加插一場名人辯論賽，辯題為「花名對政治人物有利」。擔任正方嘅人民力量議員陳志全，以自己個花名「慢必」做例子力撐辯題，反方嘅民建聯議員葛珮帆就話自己個花名「EQ」曾經鬧出笑話，但同時承認自己都幾鍾意呢個名，變相幫咗正方，結果當然係落敗收場喇！
慢必先喺台上解釋，「慢必」呢個名源自當年做商台節目主持時，公司希望幫佢同拍檔譚得志（快必）改個組合名，兩人拒用上下、左右、肥瘦等嚟區分咁悶，最後決定用快、慢必組隊，同個人特徵冇關係，唔代表佢講嘢、諗嘢或動作特別慢，但最後多得呢個花名，先有咁多人認識佢。
EQ亦澄清自己花名同情緒智商無關，只係因為佢英文名叫Elizabeth，加上佢姓Quat，兩個英文字簡稱就變成EQ。但佢都笑言初初落區介紹自己時，曾畀唔識英文嘅街坊問佢「你個名叫乜Ｑ話？」，令佢哭笑不得。EQ又透露，佢黨友蔣麗芸（阿Ann）因講嘢大聲，而畀人改咗個花名叫「元秋」，一度令阿Ann幾唔開心，大呻「我邊似元秋呀？」，但最後由黨友力氹阿Ann「元秋其實有俠女風範」，加上網民日叫夜叫改唔到口，佢惟有無奈接受。