政情：田二少義賣T恤受阻
為援助非洲饑荒而發起嘅籌款活動「饑饉三十」，今年踏入三十周年，主辦機構尋日邀得幾位立法會議員出席開幕儀式，為參加者打氣。其中新民黨副主席田北辰旗下嘅連鎖時裝店，仲特別印製咗一批T恤用嚟義賣支持今次活動，可惜受到近日嘅碼頭工潮影響，部分來貨未能及時送到全線店舖出售，可能影響最終嘅善款數目。香港工人罷工影響到非洲饑民，真係無人會諗得到。
善款全數捐「饑饉三十」
田北辰透露，早前吩咐內地廠房生產一萬件各式尺碼，並印上英文口號「食少一餐」嘅T恤，除咗呼籲港人同遊客關注貧民飢腸轆轆嘅苦況，仲會將所得款項全部捐出，一毫子行政費都唔收。但係佢呢個義賣大計實施咗幾日，都只有幾千件T恤喺十間分店售賣，原因係碼頭工潮影響咗部分貨物流程。
對於今次工潮，田北辰認為勞資雙方都錯失咗最佳嘅談判時機，勞工及福利局同勞工處亦似乎介入得較遲，最後受害最深嘅唔係非洲饑民或者佢公司嘅生意，而係影響整個香港嘅營商環境，嚟緊禮拜一佢約咗勞福局局長張建宗見面，屆時一定會敦促對方盡快諗辦法解決事件。