政情：高永文自爆有兩暗病
面對H7N9禽流感、新沙士同「限奶令」三面夾擊，食物及衞生局局長高永文呢排認真忙碌，但保持身體健康亦都好緊要。不過佢尋日出席活動時，先後自爆有兩種暗病！不過大家可以放心，兩種都只係小毛病，只要小心控制同監察就唔會出事。
消毒洗手液隨身抗疫
高永文昨早出席一個宣傳高血壓嘅嘉年華時，大爆自己都係高血壓患者，每日都要量度血壓同定期食藥，但佢強調自己病情唔算好嚴重。高永文其後出席另一個宣傳大腸癌嘅活動，再自爆曾經喺○七年照大腸鏡時發現有瘜肉，隨即做咗切除手術，隔咗咁耐都係時候再去做檢查。出席同一場合嘅中大校長沈祖堯醫生帶高永文參觀攤位時，就指住一條巨型大腸隧道模型笑佢：「呢粒可能就係你嗰粒瘜肉喎！」
H7N9禽流感來勢洶洶，高永文尋日一路為活動致詞，一路喺西裝袋拎出獨門抗疫秘方—消毒洗手液，並即場「噴噴噴」搓洗雙手！佢話十年前沙士一役，令佢養成隨身攜帶洗手液嘅習慣，因為細菌病毒主要係靠雙手接觸而來，依家捽眼捽面前都一定會先噴兩下清潔，當堂令人回想起沙士時董太嘅「洗手、洗手、洗手」經典口號。