政情：佳叔hea盡中策組
新任中央政策組首席顧問邵善波上場後，一改上手劉兆佳喺任期末段嘅hea做作風，一方面話要加強監察網上民意同開展輿論戰，另一方面又從研究資助局收回公共政策研究資助計劃嘅審批權，引起唔少爭議。不過睇番過往幾年中策組委託外界進行嘅公共政策研究，發現唔少題目都係爆完炸先諗拆彈，研究結果出得嚟都早已過晒氣，令人質疑佳叔年代嘅中策組思維後知後覺，的確有大刀闊斧改革嘅必要。
貪曾懶做公共政策研究
立法會財務委員會周一開始分批審議各政策局同部門嘅開支預算，其中行政署喺書面回覆中披露，中策組委託外界進行研究嘅開支金額，由○八至○九年度嘅三百五十四萬元，三年內急升一倍幾至一○至一一年度嘅九百二十八萬元，但去到「貪曾末年」嘅一一至一二年度，就忽然急跌逾八成至只有一百五十四萬元，反證曾蔭權政府喺落台前一年幾已經放軟晒手腳，連公共政策研究都懶得做。
具體研究題目方面，可以見到唔少都係事後孔明式嘅研究，甚少具前瞻性同先導性嘅題目，例如天水圍貧窮同缺乏社區支援問題，早喺○五年開始成為社會討論焦點，但中策組到○八至○九年仲委託緊兩間大學進行研究；又例如○九年嘅高鐵撥款爭議，反映香港嘅八、九十後青年對社會同政府有好多不滿，中策組就到一○年同一一年先進行研究；對於青少年濫藥同援交行為，亦係喺有關問題爆晒大鑊之後，先至開始研究點樣補鑊。
至於邵善波講過嘅網上民意同輿論戰問題，中策組最早開始喺一○至一一年委託港大研究，題目為《了解及分析「香港虛擬領域」內的網上民意》，到一一至一二年又做咗個《收集及分析網上民意》研究，一二至一三年則有《傳媒時事輿情研究》等，三者合共用咗成一百六十八萬元。不過回顧番過去一、兩年嘅政府施政，唔少政策措施都係背離民意同畀網民鬧爆，浪費晒納稅人嘅公帑。