中環出更：陳光明做「熊貓爸爸」
熊貓人見人愛，就算大男人睇見，一樣心動。潮青名譽參事陳光明（Johnny）早前一嘗做「熊貓爸爸」滋味，參觀成都大熊貓繁育研究中心，初次抱熊貓BB，開心到唔捨得走。
Johnny話，此行係與朋友去四川考察投資項目，順道遊成都。大家提議去睇熊貓，佢舉腳贊成。熊貓好矜貴，抱佢前要換上一套乾淨保護衣。準備妥當，工作人員就將一隻只有歲幾大嘅熊貓囝囝交到Johnny懷裏，睇見熊貓喺懷中食住沾上蜜糖嘅竹葉，Johnny十足再次做爸爸咁開心，猛影相留念。抱熊貓過程只得短短幾分鐘，Johnny話估唔到熊貓囝囝成身軟腍腍，好似毛公仔。
文殊院為陳破例開密室
抱完熊貓，眾人又拉隊參觀著名嘅成都文殊院，寺內供奉玄奘法師嘅頂骨舍利，平時好少對外開放，住持見有朋自遠方來，破例打開密室，畀大家大開眼界。臨走前，唔少得大歎馳名麻辣火鍋，辣味令團友們面紅耳熱，唯獨Johnny笑騎騎話「無料到」，事關佢係印尼華僑，食得辣，小小一鍋麻辣火鍋，濕碎到極。