政情：廖長城娶新抱 政商名人齊賀
全國政協委員兼行政會議成員廖長城（Andrew）嘅長子廖俊揚（Christopher），與在港從事財經業務嘅韓籍女友Evelyn Kang，尋日下午喺中環聖約翰大教堂舉行婚禮，近五百位親友同政商名人聚首一堂，高官方面有政務司司長林鄭月娥、發展局局長陳茂波同商務及經濟發展局局長蘇錦樑等，行會非官守成員更有超過一半到場恭賀，包括林煥光、周松崗、李國章、林健鋒、李慧琼、張震遠同葉劉淑儀等，認真熱鬧。
大爆親家全家係教授
Andrew首度榮升新老爺，全程笑到四萬咁口，滿場飛招呼賓客。佢透露一對新人邂逅於教堂，最終喺番教堂邁進人生新一頁，非常圓滿，又大爆親家全家都係大學教授，其中親家老爺更大有來頭，係南韓著名嘅植物學專家。問佢同韓籍新抱溝通上有冇難度？佢話雖然新抱唔識講廣東話，但用英文溝通一樣得，仲笑言畀新抱一百分。至於想抱幾多個孫？佢就話順其自然，都係由後生仔話事啦！
婚禮上，新郎哥Christopher別出心裁，拎起結他自彈自唱。佢喺英國修讀音樂系博士嘅妹妹Yvonne特別返港，為哥哥自組十八人合唱團，自己客串做埋指揮唱聖詩。佢弟弟Jonathan就化身公關，幫哥哥手接待來賓。
眾所周知Andrew二弟廖長江（Martin）係立法會議員，一門雙傑，原來佢哋仲有個從事房地產生意、自言完全唔識政治嘅三弟廖長天，尋日都有嚟戥哥哥開心。唔知Andrew最近係咪忙於搞娶新抱嘅事，連Martin做咗馬會董事都唔知，佢得悉後笑言，以後可以多啲跟對方入馬場玩吓喇。
卓妮