「一鑊走天涯」嘅前食衞局局長周一鑊，愚人節正式上任平等機會委員會主席。月薪十多萬，Hea足三年，攞埋約滿酬金，筍工如此多Fun，難怪佢出席支持同志嘅音樂會，唱到喉核狂震，收唔到聲！
講真，佢任食衞局局長時，大家幾時見過佢咁投入，大抵周一鑊面皮已成尺厚，膠如橡皮，你話佢「翻閹」又好，「廢官逢春」又好，佢都無動於衷。
對於周一鑊，「不論佢轉身多少次，佢背住嘅鑊還是在佢後面」，一個翻閹廢官，在其位時只知廢噏，Hea住扮演「做一日和尚敲一日鐘」，高薪厚酬唔在話，毫無建樹也算了，面對危機經常詐傻扮懵，十問九不知，答非所問，選擇執法，如今不在其位，又意見多多，「雙非孕婦」搞到香港雞毛鴨血，唔見佢有「橋」，家陣又對政府「限奶令」諸多廢噏，對H7N9禽流感又指手畫腳，所講嘅又係「阿媽係女人」。
唉，唔該佢收嗲啦！欲談時事逞英雄，倒不如敲個鑊唱首意大利歌，震醒蟄伏地下嘅蛇蟲鼠蟻啦！
對於平權立法，周一鑊一時一樣，反口覆舌，信佢三年任期內推動立法，咁就正如同文勞永樂所說，是豺狼「守護」小雞！
宋朝詩人韓維有首詩叫《遺吳冲卿大飱碑文》，其中兩句：「自非體法心，徒使觀者惑」；所謂「體法心」，就是指自己內心純正，一心一意。否則，體法不正，觀者自惑，又怎能為人釋其惑呢！
觀乎周一鑊為官之道，左看右看，上睇下睇，前窺後望，惟有鑊隨身，深得厚黑學真傳，既無體法心，徒使同志惑！周一鑊話三年任期內推動立法同志平權，老朽只能說：「姑妄言之姑聽之，豆棚瓜架雨如絲，孭着黑鑊作人語，愁聽閹官鬼唱詩！」