香港國際貨櫃碼頭工潮持續多日，勞資雙方一直各執一詞，資方仲出動到向法庭申請禁制令，限制工會人士同工人代表進入碼頭聲援工人。之不過，咁多日嚟一直都唔見有政府官員出嚟表態，責無旁貸嘅勞工及福利局局長張建宗（小肥張）更加係不知所終。有網民尋日就喺社交網站發出「尋人啟事」尋找小肥張，話佢自從上個星期三喺政府總部下班後，至今一直冇影蹤，懷疑畀人收埋待用，呼籲如果有有心人發現小肥張，就從速同碼頭工人聯絡，仲會有「厚酬」咁話。唔少網民都為尋找小肥張諗計，當中甚至有人話要去報警。如果小肥張唔想被列為失蹤人口，睇怕都要自動蒲頭喇。