政情：廢腑之言：廢官失言笑到人肚都攣

被回收翻閹嘅平等機會委員會主席周一嶽廢官上任，就對政府推行「限奶令」、香港普選、內地出現禽流感等諸多意見，當正自己係萬能俠，殊不知輪到佢自己範疇嘅嘢就開口夾着脷，講到一舊舊。佢前日出席大愛同盟成立典禮時竟然話，要畀每個人都可以盡量發揮所長，「唔需要理會佢基抑或唔直」。莫非喺周一嶽心目中，基同唔直係有唔同定義？

同志團體面前出醜

周一嶽前日喺同志團體大愛同盟成立典禮中致詞，佢就講到每個人生出嚟就有唔同嘅性傾向，就好似膚色、高矮肥瘦每個人都係唔同咁，仲話︰「我哋要尊重每個人有佢嘅基因、佢嗰個潛質，盡量發揮所長，令到佢哋喺社會度有貢獻，我哋唔需要理會到佢係基抑或唔直，呢樣嘢係唔需要考慮嘅。」佢一講完，即刻引起全場大笑。周一嶽對唔關佢事嘅嘢就口若懸河，反而係佢所屬範疇嘅嘢就開口夾着脷，呢啲咪叫做不務正業囉。

第一手消息請下載on.cc東方互動iPhone/iPad/Android/Windows Phone Apps