罕有引述泛民言論
內地官媒《人民日報》嘅報道一向鮮有提及香港泛民嘅人同事，並一律將呢班無名氏統稱做「反對派」。今次《人民日報》海外版不但具名引述劉慧卿同戴耀廷嘅言論，同王國興、梁愛詩等建制派人物「平起平坐」，更用近三分之一篇幅分析「佔領中環」行動，可謂非常不尋常，難怪令人諗錯隔籬。
不過，正當劉慧卿以為中央呢次舉動係「走前咗一步」，更大膽要求內地傳媒多啲報道泛民對其他事情嘅睇法時，《人民日報》網站下午隨即刪除文章，官方中國網、網易、新浪網等多個轉載文章嘅內地網站，亦紛紛跟風下架。睇嚟劉慧卿可能表錯情。至於《人民日報》海外版發生乜嘢事，就真係得佢哋至知，唔知有無機會水落石出呢？