政情：「爆粗」馬恩國 參選民記中委
民建聯（民記）司法及法律事務副發言人馬恩國，早前喺立法會爆粗同「長毛」梁國雄舌戰後一炮而紅，有人仲因而向大律師公會投訴佢，不過「爆粗」爆出高知名度嘅馬恩國無被嚇親，繼續報名參選民記新一屆中委選舉，馬恩國接受查詢時未有評論「爆粗事件」對中委選舉嘅影響，亦唔會特別製作單張宣傳自己喎，認真有性格。
民記新一屆中委選舉喺本月中舉行，民記中人需要喺六十二名候選人中選出五十二名新任中委，其中有三十八人係競選連任中委，包括民記主席譚耀宗，料譚好大機會再度「冧莊」中委同常委，之後再當選主席一職。
至於首次或再次參選中委嘅有廿四人，至少有五名中委候選人同時係新界社團聯會嘅活躍成員，包括首次參選嘅漁農界議員何俊賢等，其中區議會「票王」劉國勳同呂迪明兩公婆仲首度一齊參選中委；另外最年輕候選人則係年僅廿六歲嘅觀塘區議員顏汶羽。
劉江華陳百里「升呢」退任
另外值得一提嘅係，原民記副主席劉江華同前觀塘區議員陳百里先後加入政府，自動退任中委變番做普通成員，盤據地區多時嘅鍾樹根「升呢」入立法會後，自動棄選中委轉戰監委會選舉。