政情：行會成員收禮收到手軟
自從貪曾曾蔭權被本報踢爆貪盡海陸空、豪遊省港澳後，市民對高官收受禮物嘅關注度提高咗好多，最終迫使行政會議強化利益申報嘅透明度，只要收受禮物嘅價值超過二千蚊，就要向行政會議申報。新政府上場九個月，我哋統計過咁多位成員收過咩禮物，原來禮物款式五花八門，包括有深圳酒店房間券，更有人被日本政府「包起」免費去東京八日遊，亦有人收過西班牙火腿、韓國新高梨等名貴美食，仲有月餅添。到底咩月餅會超過二千蚊，真係當事人至可以解釋。
眾多行會成員中，身兼香港交易所同香港總商會主席嘅周松崗係「禮物王」，例如舊年中秋節就收咗一份西班牙火腿同韓國新高梨，不過周松崗無獨食，選擇同總商會、港交所同事分享。隔咗三個月後，周松崗又收到厚禮，呢次係出席深圳東海朗廷酒店開幕時，對方送贈咗一張房間券。我哋翻查資料，原來呢間朗廷酒店由東海集團負責管理，而東海集團創辦人係全國政協黃楚標，亦即係當初喺深圳廉租天價豪宅畀貪曾嘅商人。好彩周松崗無自用，留番畀港交所同事出差用。
「籃王」廖長城好少自用
行會另一成員胡紅玉（Anna）雖然無收過禮物，但就獲得免費旅行機會。今年二月中獲日本政府邀請，訪問東京同大阪八日，期間所有住宿、機票、交通費用由日本政府全數贊助，到底Anna去日本八日做咗啲乜，日本政府又以咩名義邀請Anna去，到底係純粹玩樂定係有考察任務，佢無詳細申報，我哋曾經打過電話畀佢，但電話一直飛落留言信箱。
其他行會成員中，廖長城係一代「籃王」，多次公開場合都收過禮物，但唔係樣樣嘢都要，惟獨係兩份由五星級酒店送出嘅中秋生果籃同聖誕禮物籃就留起自用，反而梅州同鄉會送嘅月餅、茶葉，廖長城就捐畀社區中心，只係留番一幅字畫作紀念。反而張學明今年農曆新年收過一份冬菇海味禮盒，都無留起自用，而係同職員分享，非常識做。中央近月刮起節儉風，駐港機構代表盡可能都唔收受名貴禮物，唔知行會成員會否效法？