中環出更：簡文樂獲歐盟殊榮
冠軍科技集團主席簡文樂（Paul）繼前年獲委任為匈牙利駐港澳名譽領事後，歐盟名譽領事總會尋日更向佢頒發「卓越領事成就大十字勳章」，係首位來自亞洲嘅領事獲得呢項殊榮，同曾獲呢個獎項嘅諾貝爾和平獎得主、塞拉利昂總統等國家元首「平起平坐」添！
Paul向卓妮透露，要得到呢個勳章需要過五關斬六將，皆因歐盟名譽領事總會成員國有成廿七個咁多，要得到大部分成員國嘅認同一啲都唔容易，自言「做實事」嘅佢，單係過去兩年已經捐出幾百萬元成立教育基金，資助匈牙利同本港學生互相到當地交流；而Paul自己作為匈牙利當地一間大學嘅名譽教授，亦曾到當地推廣中國文化，吸引匈國學生畢業後去中國發展，真係出心、出錢又出力o架。
玩魔術畀外孫女揭穿
尋日同場仲有Paul嘅二女簡仲珩（Joanne）帶同兩個囡囡到賀，三代同堂非常溫馨。Joanne大讚爹哋係廿四孝公公，除咗每星期抽時間陪孫女外，仲會向外孫女表演自創魔術添！不過，Joanne笑言囡囡非常醒目，成日喺公公面前揭穿佢嘅魔術秘技，搞到Paul都冇晒符。