中環出更：晏紫備戰全運 靠老公撲奶粉

剪咗一頭型格短髮嘅晏紫，尋日現身東華新一屆董事局就職禮，為總理老公李聖根做啦啦隊。見晏紫身形纖瘦，原來已重回常規訓練，老公都拍掌支持，見太太練得咁辛苦，一到周末就陪佢行街Shopping，認真Sweet。晏紫千金Iza遺傳父母嘅運動細胞，愛拎住個迷你球拍，打得似模似樣。近排內地鬧奶粉荒，李聖根每次往返中港兩地公幹，例必帶兩罐奶粉，佢笑言因為往返得頻密，存貨夠晒食。

半年前生咗男B嘅副主席馬陳家歡（Katherine）都要四出撲奶粉，佢直接向供應商攞貨，貨源尚算穩定，但對方有限制，每次最多只可買四罐，想囤積都無可能嘞。

陳宇齡（左）與前主席李三元（右）夾份買咗隻遊艇，陳文綺慧（中）卸任後，大可多啲時間陪老公遊船河嘞。	香港鐘表業總會主席及顧問黃業光（右）休息一年後，重返東華做總理，東華歷屆主席會主席孫秉樞（左）都讚佢善心，中為黃業光太太。	賭王三太陳婉珍榮升東華主席，副主席馬陳家歡（左）同老公馬浩文（右）齊聲恭喜。

陳文綺慧卸任 得閒旅遊

講番就職禮，主席陳文綺慧（Viola）正式卸任，由賭王何鴻燊三太陳婉珍接棒。三太號召力夠，唔少前總理都重返東華撐佢，包括王賢誌、黃業光、陳祖恒等。Viola落莊後大計多，身為「靈芝大王」嘅老公陳宇齡（Abraham）第一時間慰勞，請佢去日本玩。Abraham又同前東華主席李三元等人夾份買咗隻六十呎長嘅英國遊艇，前排老婆忙到飛起，未坐過，嚟緊會多啲載佢出海，四圍歎海鮮咁話喎。

卓妮