現行強制性公積金計劃容許僱主以其供款累算權益，同僱員長期服務金及遣散費對沖，勞工界多年來一直爭取取消有關對沖機制，不過打正旗號爭取勞工權益嘅三大工會，包括職工盟、工聯會同勞聯因資源問題，都採用對沖機制，暫未能做到言行一致，不過咪以為只有工會「嗌晒救命」，因為多個政黨都資源有限，都要小心控制開支，以免出現入不敷支嘅情況。
綜合各方消息指，各大黨派嘅議員助理同職員待遇堪稱「海鮮價」，主要視乎各大黨派嘅資源同財力，所以難以互作水平參照。就以泛民主派為例，佢哋長期缺乏地區資源，亦無穩定收入同「大水喉」支持，自不然對助理同職員嘅待遇會稍為遜色，惟有靠誠意搭夠，甚至希望大家都係追求民主嘅同路人，共同向目標進發。
建制派方面，自由黨畀外間印象係佢哋水頭極為充足，不過聽聞早前有關方面都要控制開支，難免職員方面會「有出有入」，相反民建聯或者無呢方面嘅煩惱，因為原來佢哋待遇都幾唔錯，除每年按公務員幅度加薪外，大時大節更有豐富禮品抽獎，聽聞電子產品同茶葉等成為「例牌」抽獎禮物，最名貴嘅連花膠都有得抽，呢個絕非其他政黨可以媲美！