政情：今日你上鏡：港鐵考察「易」
香港嘅立法會議員，尤其係代表工商專業界嘅建制派，個個都有靚車，平時去邊都以私家車代步，部分仲有司機接載，如果無私家車，佢哋寧願揮下手搭的士，都唔會搭公共交通工具。不過我哋前排夜晚近十二點喺金鐘港鐵站，就見到自由黨嘅航運交通界議員易志明（阿易）同平民百姓逼港鐵，原來佢每次去開立法會，都會以港鐵代步，一來貪快捷方便，二來睇吓市民搭港鐵有咩困難。
家住佐敦嘅阿易話，搭港鐵由金鐘返屋企，兩個站就到，連埋搭的士返屋企，十五分鐘就搞掂，如果自己揸車，隧道費已經好貴，但錢銀都事小，有時一塞車就塞幾個字，開會遲到就唔係咁好，所以做咗立法會議員都繼續搭港鐵，包無遲到。佢仲話自己身為航運交通界議員，點都要知道交通界發展成點，唔可以坐喺冷氣房就算。
阿易搭咗港鐵咁耐，佢發現港人讓座意識唔高，有啲人直頭唔知有「關愛座」，唔似得台灣、日本嘅市民咁自動自覺讓座，佢建議港鐵應該做多啲教育工夫。