現年十五歲仲讀緊中學嘅學民思潮成員黃之鋒，雖然年紀細細，但去年一役反國教風波，頓時成為炙手可熱嘅風頭人物，好多泛民政黨都諗住拉佢入黨，等佢成年後參選，點知黃之鋒尋日喺facebook已急不及待正式宣布，將會參選二○一五年區議會同二○一六年立法會選舉，呢個消息一出即惹來三千幾位網民「like」，但睇真啲先知原來佢係講笑，話想趁愚人節應一應節喎。
雖然黃之鋒宣布參選後，即時自揭係同大家開玩笑，但已經成功呃咗三千幾個「like」，仲有網民好天真咁幫佢轉載，話支持佢參選。但亦有心水清網民話，講笑都好大鑊，到佢真正參選時，選舉事務處會由尋日開始計佢競選經費。不過黃之鋒叫大家唔使擔心，因為下屆區選同立法會選舉時，佢都未夠廿一歲，都仲未合資格參選。