尋日係哥哥張國榮逝世十周年，唔少網民都喺網上洗版懷念一代巨星。唔少哥哥嘅Fans更毫不吝嗇踴躍分享佢哋同偶像相處嘅畫面情節，將個人思憶化成集體回憶，連新民黨副主席田北辰都話，佢都有嘢分享。田二少話，哥哥離開十年，佢除咗懷念對方嘅演藝成就同明星光環外，更懷念哥哥平易近人一面，至於田二少見過哥哥幾平易近人嘅一面？原來二人係「鋤弟」同麻雀腳。
田二少尋日喺facebook自爆，原來佢早年喺加拿大溫哥華住時，經朋友介紹下認識哥哥同哥哥至愛唐鶴德（唐唐）兩位靚仔（靚仔係田二少嘅用語），咁啱佢哋嘅屋企只相隔四十五分鐘車程，閒時就會互訪打麻雀和玩啤牌「鋤大弟」。二少話，雖然哥哥呢個「鋤弟腳」離開咗佢十年，但哥哥嘅歌聲、風采，仍然令人神往。相信大家都好想知道，究竟同哥哥「鋤弟」係點嘅呢？而呢段「鋤弟」時光有幾美好呢？好可惜，二少就大賣關子無再分享落去。