政情：立會烏龍團訪韓甩轆
立法會韓國考察鴨仔團終於成行，十七位議員尋日浩浩蕩蕩齊集機場出發，考察首爾嘅廢物管理經驗，環境局十位官員今日亦會出發同大隊會合。民主黨涂謹申因為「仔細老婆嫩」驚打仗決定退團，公共專業聯盟莫乃光（Charles）尋日去到機場先發現唔記得帶護照。考察團未出發已經甩轆連連，真係難以想像未來四日會發生咩事咯。
Charles尋日帶埋行李去到機場集合，先發覺自己唔記得帶護照，要即刻搭的士返屋企攞。點知鬼咁狼狽嘅佢仲要冇錢喺身，要靠團長何秀蘭（Cyd）同民主黨主席劉慧卿仗義疏財，佢先夠錢飛的返喺中環嘅屋企攞番本護照，好彩最後有驚無險趕得切上機。Charles除咗畀其他議員笑佢係「烏龍王」之外，阿Cyd仲要佢倍數捐番錢畀正在罷工嘅碼頭工人。
素食EQ 要捱芽菜泡菜
新民主同盟范國威（Gary）雖然冇遲到準時入閘，但佢入閘後竟然走咗去舖頭買奶粉。佢不滿「限奶令」漏洞多多，認為旅客先將兩罐奶粉放入行李辦理登機手續，再喺禁區買多兩罐奶粉帶上機，就可以神不知鬼不覺帶夠四罐奶粉出境。佢尋日喺舖頭問售貨員可以買幾多罐奶粉，售貨員問都冇問Gary嘅行李入面有冇奶粉，就話最多可以買兩罐。Gary最後用二百幾蚊買咗一罐奶粉，仲同埋罐奶粉擺甫士影相，話會向官員反映法例漏洞。Gary全程要同罐奶粉一齊搭飛機兼考察，佢話會盡量將罐奶粉轉送畀機上嘅初生BB家庭。
有份去考察嘅民建聯葛珮帆（EQ）就慨嘆韓國食物多數以肉類為主，可以畀素食者選擇嘅食品種類極少，去到真係可以話係「冇啖好食」。EQ話，如果議員齊齊食燒肉，佢就可以食伴碟嘅芽菜同波菜，但如果連芽菜都冇得食，佢就會專門揀啲唔算太辣嘅泡菜嚟食，例如大家尋晚食石頭鍋飯，佢就惟有食泡菜石頭鍋飯頂住先。EQ堅持唔肯自備食物，話可以趁外遊乘機減肥瘦身。