中環出更：江明熙北上義診 大開眼界
尋日卓妮喺沙田馬場遇到前醫院管理局主席「金刀梁」梁智鴻、醫療專業人士協會創會主席江明熙（Bernard）、副主席鄭淇德幾位名醫，佢哋話早前夾份買嘅團體馬「金刀銀鑽」有份出賽，所以入嚟捧場。「金刀銀鑽」個名咁特別，金刀梁解釋，「金刀」代表自己，「銀鑽」指牙醫。不過隻馬尋日成績就唔多好嘞。
Bernard話，剛剛趁住復活節假，帶隊「北上」義診三天，認真愛心爆棚。Bernard透露，醫專會每年都舉辦義診，前年去過廣西，今次就帶埋一間書院嘅中學生去東莞三日，希望畀佢哋增廣見聞。
鄭淇德話，內地民工對健康意識好薄弱，乜嘢奇難雜症都有，但係冇錢亦冇時間去醫，蛀牙、爛牙屢見不鮮，有啲內耳發炎、耳膜穿窿都不自知，最難忘係去棉廠義診，驚見民工耳仔塞滿棉花，要為佢哋逐一洗耳。
代替李國棟出任馬會董事嘅廖長江尋日履新，但佢竟然冇影，加上葉澍堃、利子厚、陳南祿等大董都冇到，頒盃時場面冷清，平日唔使落場嘅監場董事馮載祥都要焗住現身充撐場面。