《警訊》成日報道本港及海外騙徒各式各樣嘅呃錢行為，手法層出不窮，但當中有啲騙徒原來都好求其。尋日我哋收到一封以東區區議員陳靄群名義發出嘅電郵，話佢喺西班牙做醫療服務時，被人偷咗銀包，身上嘅護照、回程機票都唔見晒。電郵聲稱佢曾經尋求中國駐當地領事館協助，但佢哋唔係好幫到忙，所以請收到電郵嘅人士匯九百幾歐元、即係萬幾銀港幣過去畀佢江湖救急，話遲啲返港時一定會還錢喎。
大家有睇開新聞嘅，都知道呢類求救電郵九成九係假冒嘅，唔少知名人士都中過招，目的純粹係呃錢，但我哋慣例打咗幾個電話向陳靄群求證，希望佢平安無事。偏偏佢個電話打極都無人聽，原來佢咁啱去咗柬埔寨旅行，尋晚先至返香港。
不過睇真啲，其實封求救電郵本身已經有唔少破綻，例如雖然電郵下款寫住「陳靄群區議員」，但發出電郵嘅地址就同佢喺區議會登記嗰個電郵唔同，而且個主旨仲寫住由「Mr. Chan（陳先生）」發出，但陳靄群其實係一位女議員，相信呢封電郵唔係呃錢就係惡搞，而陳靄群嘅親友同支持者都毋須要過分擔心，千祈唔好中計！