政情：搞錯國家總理 蘇錦樑燒鬚
尋日我哋先寫過，限制受規管貨品出口理應係商務及經濟發展局嘅政策範疇。但最近喺中港兩地都引起極大爭議嘅「限奶令」，一直只見負責奶粉質素同本地供應嘅食物及衞生局局長高永文，以及負責處理水貨客問題嘅保安局局長黎棟國應對解畫，商經局局長蘇錦樑（Greg蘇）好似失咗蹤咁，引起食衞局同保安局中人不滿。尋日再有人爆料，話Greg蘇日前出席一活動時，竟自爆早前正忙於欣賞香港國際七人欖球賽，連期間電視直播突然中斷都知得一清二楚，令在場人士為之氣結。
去鐘錶商會就職禮遲到
話說Greg蘇本周二出席某鐘錶業商會嘅就職典禮時，身為主禮嘉賓嘅佢不但遲到早退，仲疑似連講稿都無準備好，惟有不斷東拉西扯同搞爛gag併湊內容。佢喺致詞中自爆近日忙緊睇七人欖球賽，期間遇到電視直播突然中斷，就即時轉到互聯網希望繼續觀看，點知轉得嚟場波已經打完，令人大失所望，希望以此說明時間真係好重要，所以鐘錶呢個行業都好緊要，聽到在場人士Ｏ晒嘴。
Greg蘇之後講到中央有乜政策協助香港廠家時，突然又爆咗幾句「總理溫家寶」，但其實當時中央政府早已換咗屆，現任國務院總理係李克強先啱。難怪有人私下寸爆Greg蘇，話佢既然知道時間係咁重要，就唔好嘥晒啲時間睇欖球賽，以及喺免費電視發牌事件上一拖再拖喇！