政情：阿涂騰雞：去緊「核戰區」
朝鮮半島局勢近日進一步惡化，擁有核武嘅北韓聲稱已下令導彈候命瞄準南韓多個目標，南韓當局亦隨即提升戒備，一場世紀核戰疑似一觸即發。不過受慣北韓文攻武嚇嘅南韓人民，似乎對有關威嚇已見怪不怪，日常生活無乜受到影響。反而一班無乜見過大場面嘅香港立法會議員，就疑似對嚟緊到南韓訪問集體「淆底」，有人發短訊自稱意外去咗核戰區，有人詢問團長如果打到嚟點算，亦有人表明想快快趣趣睇完就立即返香港，認真失禮。
十八位立法會議員與多名環境局官員，將於下周一啟程前往南韓，考察當地嘅源頭減廢同處理固體廢物經驗。班議員之前已就要求多多，有人講到明會遲到早走，有人對喺當地嘅膳食安排諸多意見，有人又要求聘請韓文、中文同英文三語翻譯等，似去旅遊多過去考察。但近日有關朝鮮半島局勢升溫嘅報道，就嚇到部分議員騰騰震。
陳克勤問團長打仗點搞
其中身兼保安事務委員會副主席嘅涂謹申（阿涂），尋日向友人發出短訊，自稱去緊核戰區。佢之後再向本報講，話已經睇晒英、美等地嘅傳媒報道，覺得今次未必係流嘢，即使考察團唔取消，亦應通知團友此行有一定風險，等佢哋自行同家人商討應否成行，但佢就聲言自己唔係好驚，除非局勢進一步惡化，否則會繼續去。
不過其實阿涂並非反應最快嗰個，佢其中一位團友陳克勤，原來早喺三日前已經靜雞雞搵咗今次考察團嘅團長何秀蘭（Cyd），詢問萬一人哋開火，佢哋個南韓考察點搞。但克勤仔聲稱只係口痕問下，點都唔肯認自己好緊張，仲話唔相信真係會打仗，到有事時亦可向中國駐南韓大使館求助。
至於早前預言過中日即將喺清明前後就釣魚島問題開戰、隨時會有導彈射向香港嘅「末日大師」鍾樹根，就坦言的確有啲驚，所以都係快快趣趣睇完嘢就立即返香港。
多名團友集體「淆底」，本身唔信雙方會開戰嘅阿Cyd惟有揸正嚟做，唔怕面懵詢問環境局點算，最後決定如果港府向南韓發出黑色旅遊警示，先至會取消行程。