中環出更：吳永嘉歎高貴「鐵觀音拿鐵」
中華廠商聯合會副會長吳永嘉（Jimmy）近日密鑼緊鼓，籌辦遲啲喺廈門舉行嘅工展會，忙到冇時停。佢日前一個下晝就忙裏偷閒，光顧深井一間隱世特色士多，品嘗即場沖製嘅咖啡、港式奶茶，以及創意十足嘅「鐵觀音拿鐵」，紓緩工作壓力之餘，仲同士多老闆鄭汝雄大講「茶經」添。
茶葉磨粉溝忌廉鮮奶好夾
呢間士多其貌不揚，其實曾獲「金茶王」銅獎，呢度嘅奶茶每杯索價六十八元，咖啡更售一百二十八元，仲貴過酒店出品。Jimmy早前經朋友介紹前來幫襯，盛讚環境舒適，裝修同擺設都好懷舊，呢度有七十年代嘅「膽機」、黑膠唱片、大喇叭，又有搖椅畀顧客安坐，邊歎茶邊聽音樂。Jimmy笑言，鄭師傅好有性格，要去品嘗佢嘅手勢就要打電話預約。
Jimmy最欣賞鄭師傅秘製嘅「鐵觀音拿鐵」，以鐵觀音茶葉磨成粉末後，加入忌廉及鮮奶各半，用大瓷碗端上奉客，奶味與茶味夾到極。鄭師傅教路，品嘗呢度出品嘅靚茶咖啡，要好似飲紅酒咁細味品嘗，每呷一口嘅層次都唔同。佢仲以「elegant」（高貴）嚟形容飲品，認真盞鬼。