新聞故事：潮爆露宿姐 自組「小家亭」
她並非一般露宿者，她衣着光鮮坐在雜物堆上，細訴自己的故事。阿Yan出身自單親家庭，輟學做舞小姐；曾風光富有，也曾墮落沉淪。看透世態炎涼，她現在瑟縮於公園涼亭，以「傘陣」築起自己的「家」，「簡簡單單咪Good囉！」
九龍佐治五世紀念公園的涼亭內，放置着床鋪、衣物、個人用品等，全屬阿Yan和另一「兄弟」所有。三十多歲的阿Yan略施脂粉，一身潮服相當搶眼，怎看也不似露宿者。她已居此處兩年，底細神秘，沒有人敢前來驅趕或偷竊，「新嚟嘅Police（警察）唔知頭唔知路，見我哋瞓呢度就以為我哋係乞丐，哈哈！」她說時手舞足蹈，手腕上的金錶閃閃發亮。
阿Yan感慨兒時父母離異，得不到家庭溫暖，整天出外「蒲」，十三歲已在大角咀「群埋啲壞朋友」，母親把她送到英國讀書，但反叛的阿Yan兩年後偷偷返港，「我十六歲就返咗嚟喇，英國冇咩好，勝在Tattoo（紋身）啲款幾靚，我整咗幾個。」她說罷即轉身拉高衣服，露出背部的紋身。
曾淪落風塵 等男友放監
「我後生嗰陣幾靚o架，做過舞女畀人包，下下都幾十萬。」拍照前，她總要先打扮一番才肯上鏡。她透露，以往曾與染上不良嗜好的朋友夾錢租屋住，生活糜爛，直至兩年前遇上了真命天子，令她決心改變生活，「佢係生意夥伴，Cool Cool哋幾靚仔o架，似李璨琛，我留意咗佢好耐，之後先鼓起勇氣行埋去……」不過，男友如今身在獄中，「佢仲有六個月先出返嚟，依家真係度日如年……我會等佢出嚟。」阿Yan展示手臂上男友和自己名字的紋身。
為愛情，她甘願放棄以往生活，更索性搬到公園居住，每天和小朋友玩樂，過得簡單自在。訪問期間，她坐在床鋪上，與躺着的兄弟交談，一時又玩弄在旁的小貓。經歷大起大落的前半生，她自言現時一切已歸於平靜，只想靜靜等待男友歸來，「之後係點？未知o架，鍾意咪結婚，最緊要簡單、開心！」
文：李夢帆
圖：梁偉恩、甘偉倫