觀塘翠屏邨和鴨脷洲利東邨均有多年歷史，兩邨街市和商場在過去更是居民重要的「搵食」地方。然而隨着人口老化，鄰近地區的發展，以及在領匯的貴租下，現在的翠屏街市幾近十室九空，利東商場亦無復昔日熱鬧。
記者日前往翠屏街市，發現二樓超過二十個舖位，只有六間店舖正常營業，細問之下，發現大部分租約均將在本年內到期，其中四名商戶直言領匯租金「有加冇減」，加上街市人流稀少，根本難以維生。經營車衣店的馬女士指「做得掂都會做」，但當得知一旦續約，除了要繳付上升的租金，還有保險費，立即表示：「咁真係要諗清楚會唔會繼續做。」
剛開張不久的水電店李先生更坦言「中伏」，捱過三年租約期後，「應該都唔會再做落去！」有街坊慨嘆翠屏街市「死亡」命運難以扭轉，「我哋同街市檔主好熟，間唔中會嚟傾吓計，如果佢哋真係全部都唔做，真係好可惜。」
而利東商場亦是「小貓三兩隻」，全區唯一酒樓數年前結業後，舖位一直丟空，區內長者頓失「打牙骹」之地，報販楊太亦慨嘆酒樓結業後，生意大減。
文：鍾健怡、陳偉豪
圖：梁偉恩、關萬亨