政情：八網難逃：任亮憲還錢當畀帛金
社運圈子嘅錢銀關係向來複雜無比，有拖無欠、有借無還等例子不時發生，唔少例子最終搞到反目成仇。人民力量黃毓民最近係網台爆料，話有「維園阿哥」之稱嘅任亮憲，去年七一被捕後由於無錢保釋，毓民即時拎三百蚊幫佢搞保釋，點知拖到最近先還錢。但咁都唔緊要，任亮憲仲專登還多一蚊畀毓民，即係暗示當做帛金咒毓民去死。
呢件事傳出後，即刻喺網上瘋傳，有網民覺得任亮憲咁做好無品，亦有網民力撐，覺得只係毓民過分演繹。
支票還毓民$301保釋金
毓民尋日就話，呢件事令佢心痛嘅地方，唔係連三百蚊都要遲還，話晒幾百蚊濕濕碎，每次遊行示威，佢都幫過唔少人畀保釋金，好多都係一去無回頭，但從來無人試過咁樣玩嘢，專登入張三百零一蚊嘅支票畀佢。毓民話任亮憲咁大個人，無理由唔知道畀零頭係咩意思。兩人當年曾經亦師亦友，現時搞到咁收場，政治真係變幻無常。