為咗發放正能量，聽聞政務司司長林鄭月娥正領軍推動四大香港主題，冀能凝聚全城力量發放正面訊息。據聞呢個大型運動最快會喺四月底財政預算案獲立法會通過後面世，歷時至少半年，港府為咗隆重其事會為此創作標誌，稍後更會推出主題曲添。
有知情人士透露，林鄭最近接連邀請跨界別人士舉行午餐會，期間透露港府有意同社會各界團體合作，在今年年中開始推動四大主題，包括「活力香港」、「潮流香港」、「關愛香港」同「清新香港」，據悉幾乎政府各個部門都會參與其中，當中以民政事務局嘅角色最為吃重，至少有兩個半主題同佢哋有關，另外教育局、環境局等相關政策局自然亦要幫手。
就以「清新香港」呢個主題為例，消息指有關主題涉及範圍特別廣闊，包括環保、衞生同減少廚餘等，有致力促進減少廚餘產生嘅團體開始做前期準備工作，據聞正同大型發展商商討喺佢哋旗下嘅商場，做好啲廚餘回收工作，包括正游說佢哋設立廚餘機。至於「活力香港」主題，據聞有業界正計劃搞兩岸四地比賽切磋交流，並擬邀請內地同外國金牌運動員來港助陣，冀能為青少年注入正能量。
不過咪以為四大主題當前，政府會提供源源不絕資源，消息指政府資源有限，主要靠民間自發舉行活動，之後當局會有系統整理活動，並上載至專門網頁介紹，遲啲仲會有個啟動儀式添。唔知到時會否有個別開生面嘅啟動儀式，令呢一系列活動打響頭炮呢？