只得佢領悟喬老爺說話？
中聯辦前晚發表喬老爺當日向議員發言嘅全文，一共有十九項要點，其中一項披露咗佢形容泛民要求西方普選套入香港，猶如帶領香港人遊覽西方花園，然後想將西方花朵擺喺香港種植，但喬老爺講明西方種咩花係西方憲法嘅規定，香港能夠種咩花就係《基本法》規定，唔可以話種唔到西方花，就係唔民主。
喬老爺呢個西方花園嘅比喻，三十幾個建制派議員入面，得Jeffrey領悟箇中意思，閉門會議後向傳媒引述。
不過大家都以為佢帶緊記者遊花園，以為係佢吹水，所以無加以重視，都唔知係佢表達方式有問題定係記者喺領悟方面出問題，不過Jeffrey話自己一啲都唔介意，最緊要係市民清楚喬老爺講乜就得嘞。