政情：阿涂不做「低頭族」
立法會超級議員由全港選民投票選出，諗都諗到工作量一定重啲。不過民主黨超級議員涂謹申（阿涂）就話，做超級議員同做地區直選議員嘅工作量都無咩分別，唯一唔同就係依家搭港鐵時要特別小心喎。
囝囝係佢嘅「興奮劑」
阿涂話，以前佢喺九龍西出選，投票畀佢嘅都只係九龍西選民，但佢依家就係全港嘅選民，得票三十一萬幾，街上同港鐵上隨時遇到投咗票畀佢嘅市民，所以搭港鐵好留意，費事用手機低頭上網時，市民誤會佢唔同人打招呼，好似好寸咁。至於啲工作量點解冇分別？阿涂就話，做議員以來呢廿多年從未得閒過，所以唔覺得因為做咗超級議員而特別忙咗。
阿涂依家除咗要出席區議會會議外，仲加入咗立法會八個委員會及至少八個審議法例嘅法案和附例委員會，平均每日接收十個市民個案，所以惟有分配好時間。
不過阿涂話從無感到壓力，因為囝囝涂信之嘅出生為佢人生帶來好多歡樂，好似佢嘅「興奮劑」咁，睇到佢啲相就非常提神咁話，再加上太太同家人嘅百分百支持，所以平時全無後顧之憂。