政情：莫宜端緬懷做記者
傳媒人出身嘅勞工及福利局政治助理莫宜端（Zandra），加入政府之後生活作息比以前「正常」咗好多，朝早五點幾就要起身，七點幾出門口返工，比起做記者時經常要深夜十一、二點至收工，十足古人「日出而作」咁健康，冬天時仲要早過太陽起身添！不過Zandra話，好懷念做記者嗰段未嫁時光，可以瞓到自然醒，仲話呢個係佢人生最大嘅改變喎！
爭取返工前親子樂
Zandra雖然早咗起身，但係又冇得早瞓，原因唔使多講喇！咁早起身係為咗抓緊時間見吓對仔女。佢話平時返到屋企之後，一對分別四歲半及一歲半嘅仔女多數已經瞓咗覺，如果仲未瞓嘅話，佢就陪佢哋上床，等仔女瞓咗至起身開電腦繼續開工做嘢，平均每日只係瞓得五、六個小時。
Zandra仲話，小朋友通常朝早六點幾就會起身，所以佢返工前會加插一段親子時間，陪子女玩或讀故事書，盡吓做媽咪嘅責任，然後先搭港鐵返工，聽落又真係好忙。難怪Zandra話掛住做記者時，可以瞓到好晏先至起身，話晒當時仲未嫁，唔使湊仔吖嘛！