政情：Greg蘇縮骨 公僕做死
「限奶令」雖然涉及進出口事宜，但整個「限奶令」就由食物及衞生局局長高永文牽頭處理，而商務及經濟發展局局長蘇錦樑（Greg蘇）就全程影都唔見，惹嚟唔少官場中人紛紛耳語。不過高永文咁搏，又無理由阻佢民望爆升，可惜高永文頂得順但就苦了手下一班公務員。三月急推「限奶令」，結果因為條文寫得唔清唔楚，搞到前線海關無所適從，最後出現米糊當奶粉嘅拉錯人烏龍事件。尋日仲傳出食衞局常秘黎陳芷娟做得唔多開心搞到遞信辭職。
黎陳芷娟澄清謠傳
黎太遞信辭職嘅消息尋日傳出後，惹起政界官場一陣騷動，即使食衞局嚴詞否認「絕無其事」，仍未能撫平騷動。尋日，黎太如常出席立法會審議「限奶令」小組委員會，甫現身即時成為傳媒追訪目標，但佢就重申絕無辭職呢回事，又話傳聞無根據。被問近排處理「限奶令」係咪好大壓力，黎太就話政府都係全心全力服務市民，最大希望係透過法律保障香港嬰兒有足夠奶粉用。
尋日委員會上唔少議員見黎太做到咁辛苦，都不忘紛紛鼓勵吓佢。新民主同盟范國威就鼓勵黎太話推限奶令天經地義，仲話希望黎太深思一下係咪真係要辭職，博得黎太一笑。而民主黨單仲偕就話戥黎太唔抵，事關過往香港出現食米供應問題都係商務及經濟發展局主理，不過唔知點解今次唔見Greg蘇出現。黎太就大方回應話，今次限奶令歸食衞局主導「絕對唔係問題」，事關該局對食物供應有政策責任。
事實上，Greg蘇「消失官場」嘅微言喺政界官場都出現咗一段時間，對上一次見報好似要數到佢帶個新政助陳百里去立法會招搖「蘇」off。不過講到做正經事，就好似總係唔多覺佢嘅身影。例如近日嘅港台風波擺明係政治事件，但Greg蘇就唔知去咗邊。想問Greg蘇免費電視牌照幾時會發，亦唔知去邊搵佢。聽聞唔少官中人都對Greg蘇今次喺「限奶令」一役縮骨唔落水唔多滿意，今次傳出公務員做到爆煲遞信，兇手是誰相當明顯。