中環出更：潘德明買車行善碌卡150萬
如果碌卡唔設上限，去用嚟買啲乜，相信好多人都要慎重考慮，不過博愛醫院主席潘德明就諗都唔使諗，計劃一碌百五萬，去買部靚車。
獲專屬信用卡 不設上限
博愛醫院尋日同中銀信用卡攜手發行咗一張只供博愛董事局及歷屆總理聯誼會等「自己人」用嘅信用卡，博愛主席潘德明、副主席李鋈發及潘美蘭等一眾總理都去支持。呢張信用卡尊貴在消費不設上限，銀行會將部分簽帳金額捐予博愛作發展社會及醫療服務用途。從此可以慈善之名碌卡消費，一眾總理開心到極，潘德明率先響應，佢話咁啱要換車，已睇中價值一百五十萬元嘅靚車，新卡到手後一於先碌為快。
中銀信用卡副總經理盧慧敏解畫話，呢張卡比白金卡更加尊貴，特色係冇得申請，要由銀行發信邀請，所以絕對係身份地位嘅象徵。今次亦係潘德明卸任前最後一次大騷，新舊董事局成員隨即喺同一場地開會交接。候任主席曾耀祥話，已作好準備未來一年有排忙，不過做善事無所謂喇！
卓妮