中環出更：馬時亨談夫婦之道啟剛偷師
青年聯會賢慧社不時會舉辦分享會，邀請來自社會唔同界別嘅名人講吓城中熱門話題。前日佢哋就搵咗口才了得嘅前商務及經濟發展局局長馬時亨（Fred）做講者，分享佢從新經濟觀看新男女關係。出晒名幽默嘅Fred好識搞氣氛，開口第一句就話自己刻意唔打呔上陣，係為咗襯番一班無拘無束嘅年輕人。本來打咗條粉紅色領呔嘅常務副主席霍啟剛聞言，即刻笑笑口咁當住大家面前除低條呔，咁識做，大家齊聲讚好。
當日青聯主席葉振都（Adrian）、霍啟剛同賢慧社一眾靚女變身同學仔，排排坐咁聽Fred授教男女相處之道。初為人夫嘅霍啟剛同Adrian霸頭位坐喺第一排，睇嚟對呢個主題甚感興趣，全程仲好留心咁聽，唔通想從中偷師？Fred話，無論男女都好，兩個人相處難免有意見不合嘅時候，至緊要係互相尊重。
自爆啱啱與太太鬧完交
佢大爆自己兩個星期前先至同太太鬧完交，最終一樣和好如初，秘訣就係千祈唔好喺火遮眼嘅時候，衝口而出講啲冇得返轉頭嘅說話。最後當然係要顯出男士風度，平心靜氣咁主動同女士溝通啦。
Fred演講嗰陣，不時巧妙地拋個波畀啟剛，佢話，當一位男士搵到個賢內助喺背後支持自己，對事業同人際關係都會有好大幫助，然後笑指啟剛就係一個好例子喎。Fred演講完之後，成班靚女爭住同佢影相留念，十足十大明星咁款，認真威風。Fred雖然淡出官場已經好幾年，但人氣都一直保持高企，確係有佢嘅功力。
卓妮